英國首相文翠珊(右2)早前改組內閣。
以前睇電影《食神》，最鍾意嘅片段唔係天台office屙屎博老細歡心上位嗰段，而係家燕姐做評判嗰陣，佢原本想畀星爺「食神」之稱號，點知佢屋企人又呢樣，有晒痛腳畀人揸住，真係好痛苦，最後都係要判星爺輸咗。
政治人物都係一樣。幾時留低，點樣留低，為何留低，都係一念之差。呢個星期，英國政壇真係風雲驟變。首相May姐，為咗保住權位，借因為返工睇鹹網而辭職的閣員的機會，改組一下內閣，轉下音樂椅啦。點知佢搵啲閣員入去傾，有人唔領情，索性劈炮，搞到May 姐好尷尬，仲響公眾面前，搞咗一次小型的政治危機！
你會問：老細轉人，換吓位，咪當一次轉換工作機會，學多啲嘢，唔係更好咩？但大家唔好忘記，英國之內閣制，唔係美帝之總統制。美帝之總統制，係一人話事之制度，老細唔like可以即刻叫你鬆人。英國內閣制之意思，係大家都係國會議員，內閣成員只係有行政職位而已。至於首相，起初，大家要知道都係國會議員，一樣咁高咁大，你只不過有個Prime字，然後係minister，而唔係P字之President。
所以，英國首相唔可以用一種絕對權威之態度去指揮其他閣員做嘢，轉換職位，將你由外相又調去做商務大臣。咁即係話，如果May姐你委任我做閣員，我會多謝你，但你唔係有絕對之權力，我地閣員都有自己的想法及打算。你首相大人之大局，係你嘅問題。當你要我注意大局做閣員時，呢個係你首相之大局，未必係我作為國會議員之國家大局。我冇必要去維護你嘅大局。你唔可以迫我留低幫你做事。
英國係老牌民主大國，佢地議政文化好成熟，大難臨頭各自飛係常態。所以，佢地做首相嘅，要上位嘅，點都好一定有一個班底。然後呢個班底贏咗選舉之後，佢地就會走出去同其他派系合作共治。一個班底唔會自己玩晒，亦唔能大到一人獨大，隻手遮天。分權係常態，離開是常態。當呢啲閣員發覺自身有醜聞，就算首相叫佢留低，佢都未必咁樣做。因為為咗政治醜聞而下台，佢地響day one從政時已經好明白，你的醜聞會影響嘅係大局。呢個大局，短期內未必衝擊到政權，但好可能會影響自己以及政黨之政治前途，更加係負責任之行為。
但香港呢？有局長司長出事，老細叫佢為咗大局唔准辭職，情有可原。因為剛上任就辭職，對團隊影響好大，但係，呢啲老細又知唔知，死撐唔辭職之後果會點呢？五年前，有個領袖又係咁樣，唔畀醜聞上身之囤地局長辭職。後來呢？呢位囤地大官，仲可以升職，但係上司就冇得續任。
前車可鑒，華姐係未要走，定係維護緊人地之大局呢？我唔識答了。