美中貿易戰開波，球來球往。依家大家應該知道，仲以為侵侵講金唔講真，有錢可解決貿易戰的話，就真係傻。即係話，香江各位大姐，需要思考兩邊會點樣打，最壞嘅情況會係點，同埋點應變而已。
以前仲有人認為，貿易戰係七傷拳，你瓜我又死。依家係，美帝唔怕內傷，點都打殘你，自己傷晒五臟，你就入埋ICU，咁即係話，香江夾在中間，好鬼惡搞。新加坡前外交部長講，依家個國際形勢係，迫緊國家響傾中定親美之二元對立下表態。佢就話，坡佬之應有態度唔係是但選一個，而係親新加坡，企響坡佬利益出發。咁香港其實唔複雜，即係響兩邊開打之時，揀一個對自己最有利之位置去行事。
咁即係點呢？大家仲可以imagine一下，日後好多貨品會經香港入口，然後轉去北方大國。美帝知道之後，會唔會有報復反應呢？又或者有啲貨品，明明係北方大國製造嘅，咁忽然又變成香江出口去美帝，咁美帝會唔會嘈香江政府呢？又例如，美帝落柯打，要香江政府嚴查某啲經港轉口之貨品，咁香江政府敢唔敢因為國家利益，唔依循美帝之要求呢？
當然，我地更加唔好講，萬一美帝利用金融戰線，迫香江政府做嘢啦。例如話響金融方面，美帝話要禁止某些國家同官員之戶口交易，剛剛又同北方大國有關，咁香江做定唔做呢？聽唔聽美帝之柯打做調查兼交換情報呢？又仲唔計到時美帝入口貨品，隨時貴到飛起，咁又一啲高科技之東西，香江都冇辦法入口唔到香江呢？
香江太平盛世咁耐，好幾十年享受咗做北方大國南風窗之好處，一方面就響上面搵好多水，另一邊又幫人地進入大國。好啦，依家美帝暫時唔郁香港……住，但就係咁郁北方大國，香江始終都要做抉擇，做邊樣嘢對香江市民最有益呢？咁有幾個要點要睇住嘅。首先，就係要先穩住經濟保就業先啦。因為大國交火，最麻煩就係某啲國家真係做大咗，過火咗，將貿戰炮火射過香江，影響香江經濟。咁第一個原則，當然係保住經濟啦，有咩風吹草動都好，要立即出手頂住。
第二樣嘢，有需要嗰陣，就需要同國際社會一齊行動。早前美帝要搞鋁材入口，大加關稅，原來香港有本土公司，真係受到懲罰性關稅。咁就真係大件事。香江政府呢？剩係話遊說，同美帝講道理，咁就真係好笑。唔通香江政府會以為，你同一隻野獸可以講道理咩？真係笑死人。響呢個時候，香江既然係世貿成員，係未可以同其他世貿成員國傾下一齊合作反擊呢？唔通同美帝寫信解釋做筆友咩？今日本土鋁廠可能影響工人唔多，但如果他日針對香港金融業呢？
形勢一定會走得快過港官之決策，大家扶穩了。