侵侵都有對手。佢響共和黨的總統初選，要面對五十幾個對手。響美帝總統選戰之中，現任總統固然有優勢，不過黨內提名程序點都要走一走。由於共和黨內有好多人不滿侵侵，咁以佢依家咁樣政績……要贏初選應冇難度。
侵侵連任主線有三：委內瑞拉，伊朗同北京。三個地區，兩個共產主義政權，一個係回教遜尼派。由於伊斯蘭國之老巢已經被剿滅，美帝要搵回教敵人，自然係死敵伊朗。三線之禍福，唔係純粹睇三地之政局，仲要睇選舉因素。如果美帝要出兵捍衛人權，捍衛人道危機，捍衛民主自由，總統講聲就飛機大炮戰艦打過去。但侵侵之盤算，當然唔係真係講人權自由等價值，而係講選舉價值，即係究竟幾時出兵去委內瑞拉，幾時炸兩嘢伊朗之設施，對自己選情最有利。至於中國牌？就真係睇有刁同埋冇刁，對選情邊樣最有利就做嗰樣。侵侵嘅玩法，係要將北方強國之貿易談判，同大選綑綁埋一齊，如果選民要刁，佢梗撲上去簽協議啦，如果選民反中反到出晒面，唔要刁，侵侵一樣得。傳統智慧係，中美你中有我，我中有你，全球化下各國依存度高，兩國都想要有刁……依家似乎唔似囉。
美帝侵侵之心意好清楚，就係壓制北方強國，然後就獎勵嗰啲對美帝好之盟國。唔知English Choi同美帝買軍備，算唔算係獎勵啦，但佢依家全面一邊倒親侵，然後扯高同北京嘅對立氣氛，神奇地，English Choi在島內的聲勢又上番去。English Choi之選舉形勢本來不利，轉用反中險招，挑起了兩岸緊張氣氛，然後轉頭向美帝加強示好，居然又得咗。台灣同美帝越來越好朋友之下，親美呢張牌，早就畀English Choi搶走咗，搞到其他參選人已經冇辦法同English Choi鬥親美。大家睇到，其他總統參選人，好多表面就扮中立，實際上都要同北京眉來眼去，唯有轉用親中牌，試下可唔可以同English Choi抗衡下。 不過依家English Choi已經響民調，越過競爭對手賴清德，呢樣明顯睇到，台灣總統選舉又試返去統獨之爭議矣。
所以，今時今日睇局勢，已經唔可以只係睇本地事務，最緊要係美帝因素。既然美帝全方位叫全世界歸邊，一係支持佢，一係支持中國，果啲所謂中間路線，又或者第三條路，只會係不歸路，因為即使閣下想走中間路線，不單美帝唔會畀你咁做，北方大國亦唔會畀你做。依家全球從政者，只能夠響親中或者傾美作出抉擇。台灣佬已經作出選擇，只不過香江的政治人物睇唔透而已。如果仲以為，我地香港人，只係經濟動物，政治嘅嘢唔理就冇嘢。你避得開北京嘅衝擊，但係唔會避得開美帝。依家逃犯條例修訂，就係美帝要你反對，同埋北方大國叫你支持嘅鬥爭。冇得避也。
倫敦大學亞非研究學院法律系博士