記得2015年9月開學頭幾天，有一位11歲的中學生因學業壓力而自殺，到那年除夕一共有12位同學相繼因不同壓力他們的生命而被迫結束。那時候我天真到以為新一年新氣象情況就會改善，可惜到2016年情況變得更壞，光是頭三個月已有16位年輕人相繼自殺。
當時我喺度諗，我不是他們的社工或老師，更不是他們家長，如果唔係佢哋主動搵我，我基本上都愛莫能助，即使我已不斷去學校或機構去演講生命該如果死得招積，還有自己幾乎每一晚都需要幫助年輕人或處理末期病患朋友的求助，單憑一己之力，實在有限。正當自己開始埋怨坊間的相關服務機構的能力時，心裡想：與其埋怨，不如行動，所以才開始有想成立慈善機構這想法。
當初我無知得以為成立機構只是需要一兩個月的事，但原來過程相當艱鉅繁複，當中成立過程的辛酸史有機會再容後再談，總之，最終就算得到各路英雄相助也要到今年2017年頭才收到有關稅務條例S88的通知書，《死嘢 SAY YEAH》才正式以慈善機構名義成立。
本來，我也有產生過一些念頭，心想難得呢間機構終於在風浪中成立，係咪都好應該慶祝一下搞個Launch Event之類，反正間間慈善機構一推出新服務都大鑼大鼓咁話俾人聽㗎啦。
但自己再反思多一陣就知道，其實每一間慈善機構之所以需要出現的原因，就係因為要去改變世界正發生的不幸。
若然世界沒有人需要幫助，世界上沒有任何被遺棄的狀況出現，所有以慈善為名的機構就沒有任何存在意義，甚至根本沒有任何資格存在，《死嘢 SAY YEAH》這機構也一樣。你幾時見過Batman開開心心高高興興大鑼大鼓咁去救人？
這機構剛成立，莫講話有限，根本就係零資源，所以只能在自己專欄發布；但亦因專欄篇幅所限，也只能講到呢度。到底呢間機構係有咩服務，請登上 http://sayyeah.org.hk 望望，看後認同請分享，反感請廣傳，萬謝。
