我知道有環保界朋友，已經就大灣區的可持續發展方面，做緊功夫，特別想趁大亞灣核電廠仲有十幾年左右到期，準備推動無核家園。
其實我都替依家民間團體大叫辛苦。因為單係乜嘢「香港2030+」嘅規劃，已經搞到大家好鬼忙。大家仲未定神之際，忽然間又要處理大灣區之規劃，真係透不過氣。
其實搞香港未來規劃的朋友，點會唔知「香港2030+」背後的概念，其實就係要同大灣區發展接合。所以，響忙完香港之未來規劃之後，佢地自然就會響「無核大灣」之問題上，再擴大一啲去思考。
第一樣嘢，就係「永續」之概念，點樣可以響大灣區落實。因為「無核大灣」正好就係一個「永續」能源產業嘅一部分，即係話，點樣響大灣區全力推動無核家園，潔淨能源。呢方面，香港公司同工程師，點樣配合大灣區之能源需求，做一個評估，將成個大灣區轉為潔淨能源，再響經濟產業上，大灣區全面開放電力行業的壟斷，讓港資都可以進入大灣區之上下游之電力市場。日後廣州佛山嘅居民都可以揀中電同港燈嘅供電，係咪好事呢？到時候，香港嘅電力工程師亦可以北上名正言順地工作，呢方面，香港政府就要同上面傾，響大灣區專業服務方面，唔好搞保護主義，唔好搞大門開小門唔開嗰啲衰嘢，表面開放香港專業，實際上唔畀港資港專業人士北上，工程師掛正牌響大灣區幫港資建設電網發電廠推動可再生及潔淨能源，咁就真係冇得頂。
「永續」概念嘅另一個著力點，就係「無核大灣」2.0，即係點樣推動潔淨嘅資源同發展策略。呢方面就需要響大灣區做先行先試嘅綠色經濟活動。大灣區個個城市之GDP，已經超越晒香港，依家仲有香港商家佬話點樣去支援大灣區發展，真係out到震，畀人私下笑你「港燦扮大牌」啦！不如實事求是一啲，就點樣大家齊齊提高生活品質下功夫啦。例如依家連澳門都唔准賣活雞之時，大家都明白，點樣推動農業發展，等大灣居民食得安心，食得順心，成為全國最安全之食物資源之地，係有助大灣區居民提高生活品質嘅。
所以，大灣區就唔應該只係基建、起樓、高新產業，反而要係針對生活品質、針對可持續資源發展做功夫。呢方面，就要嗰啲市長，唔好學香港九十年代咁樣拼起樓拼地產，而係拼綠色GDP，咁響有機農業之推動方面，部分大灣區之鄉郊地區，素來就係廣東，包括香港之糧倉。佢地就唔好學上面部分城市，玩收地兼併搞高新創意科學園，跟手背後炒樓谷高GDP跟手升官一走了之。反而係點樣合併人才資源，搞好農業，弄好水同空氣，將大灣區成為全國最低PM2.5之地方，生活品質好，唔係更好咩？
