倫敦大火的畫面相當嚇人。自從社交媒體的現場直播的功能出現之後，大火也有直播，於是，全球好多人，只要你頂得住果種揪心，就可以睇住直播的慘劇，有社交媒體的朋友話，睇到唔敢睇落去。
我在電視媒體工作之時，最唔想做嘅就係慘劇的直播。點講呢？好多時呢類國際級的慘劇，都可以響外國的電視頻道睇到。除非你係「新聞控」，即係睇新聞睇到上晒腦，每日乜嘢頻道都睇，否則好多香港朋友又真係好少睇到直播慘劇之過程。一般國際新聞，由通訊社「餵」到閣下電視機之時，已經過專業之新聞人員編輯過，執好晒，咁樣就唔會感受到「慘劇」，除非你真係一日到黑睇實個外國媒體螢幕。
咁多年來，當然睇過唔少呢類片段，慘劇點慘，戰爭、大火、屠殺、天災，有幾慘可以幾慘，但都練就咗個鐵石心情頂落去，睇完就寫稿。觀眾睇到嘅係經過專業處理的新聞，以及照顧香港觀眾及審查制度下的片段。所以，當大眾要真真正正，去睇住慘劇發生，例如閣下如果真係從直播之中，睇住架客機飛去撞世貿中心的片段，大部分人好容易會出現情緒不安，兼且會感到無奈及痛心。
好多人話，直播呀，「真相」呀，有圖有真相呀，依家係乜嘢年代，仲需要所謂新聞專業人士同你揀選及編輯呢？讀者要「真相」，就不如將個電話按個live掣，各處各地想睇「真相」就睇啦，你睇下，係未好慘呢？講呢類嘢嘅朋友，好似好有point。呢種講法，響當年CNN響美帝橫空出世，係唔係都搞「直播」，差人汽車追逐匪徒，就租架直升機響上空直播，等大家睇下差人點樣捉賊，搞足幾個鐘頭，直播呀，好刺激云云。
直播雖然係常態，但就唔可能有「真相」。慘劇的震撼場面，係要警醒大家，既一方面點樣去協助救援，幫手去做可以做到嘅事，但同樣係要大家去追究意外發生原因，邊個會搞到件事不可收拾，係未有人犯錯等等。睇直播而冇人去幫觀眾擺正個焦點去追究責任，防止日後有同樣事件發生，只會搞到觀眾揪心不安，咁樣真係為咗搶like呃眼球冇分別。
經過媒體報道之後，記者們去探究，似乎係外牆物料的東西出咗問題，搞到事件不可收拾，同埋令到啲火好快由下而上燒上去。呢啲未必係官方之意外發生原因，但至少有一個可信的理由，讓大家既要善後，協助死傷者家屬，同時亦係追究落去的方向。到截稿呢一刻，已經有記者們去查緊，究竟邊個要將唔抗熱之物料安裝響外牆，究竟係為咗慳錢定係點樣？既然呢種物料係唔適合做外牆，因為有增加火災風險，邊個做呢個決定呢？
其實，做直播，依家唔難，網上吹水亦唔難，但做好新聞，搵真相，真係要人才同埋錢……。
