直至依家為止，仲有人以為侵侵是假反中、真談判的操作，以為侵侵到頭來必然會同祖國傾好貿易協議，真係有啲幻想。
認為侵侵係假反中，真談判的朋友認為，早幾日侵侵忽然出山，聲稱可以響貿易上，如果祖國讓步的話，佢又會叫商務部鬆手，等Z公司可以翻生，咁仲唔係讓步？
如果大家轉頭睇侵侵響對伊朗態度，以及遷走駐以色列使館就睇到，就算你地街外人響外面點樣嘈，無論你地歐盟搵埋法國有型總統去傾，侵侵都唔會停手。佢只會響群情洶湧之時，私底下暫時潛水透氣。事過境遷、風頭火勢過咗之後，佢依然會紋風不動，都會硬係去馬。
侵侵班團隊，巴人死幾十個都無動於衷，更何況係偉大祖國人民的工作機會？侵侵只會口講關心自己國家之工人，連美帝工人的飯碗都未必保得住，更何況幾萬丈遠嘅工人？
當然，偉大祖國都唔係個個極左上腦，又或者極右食腦嘅，絕大部分決策嘅都係務實型。佢地點會唔知呢？正因為大局來睇，隨著美帝年底國會改選在即，下年初侵侵就要為連任而戰，侵侵點都要搵個敵人拗手瓜，扮強大。搵偉大祖國就真係好好之沙包。如果祖國人民真係寸步不讓，真打貿易戰，侵侵就可以大條道理咁樣鬧。越鬧得勁，原有鐵票固然happy，中間選民會撐侵侵一定要擺硬唔輸得，於是隨時越鬧祖國越有票。假如偉大祖國大讓步，息事寧人，侵侵成功爭取，又贏。
而且，侵侵四處點火，扯起咗美帝之反中氣氛，國會山莊都要去反中。國會政客點都要響反中方面表個態，咁樣氣氛下，邊個講啲務實些少之言論，都會被美帝政客圍揪。由於係咁，偉大祖國其中需要思考嘅務實方向，就係要穩住可穩住之因素，唔好畀外面之勢力搵借口搞搞震，畀美帝班政客借勢做嘢。
例如偉大祖國素來睇English Choi唔順眼，因為佢日日響度表面姿態軟內裡搞暗獨。但係，偉大祖國係口水多聲氣惡，點都有一個限度。因為如果真係惡到郁身郁勢，郁之時力度過咗火位，美帝即刻搵到借口做嘢。其實，早輪軍機繞台，又航空母艦經過台海係有後果㗎，上個星期，美帝軍火商又去咗搵English Choi傾下賣軍火之事。軍火商如果做到English Choi生意，梗係轉頭撐侵侵啦，咁侵侵下屆連任又多咗好多人支持矣。
又例如香江事務，好打得上台後相對穩定，但係唔知點解總有人要好打得搞23條，又有人開火話本地仲有人獨港云云。咁好嘞，如果因為咁樣，香江又有一次超大型政治運動，又上街示威，轉頭又反制，社會撕裂，如此嗜血之侵侵，如果響Twitter贈番一兩句支持香江人爭取自由，咁會唔會又畀美帝入到位反中，幫偉大祖國添煩添亂呢？