選舉嘅嘢，同射十二碼一樣，一係入，一係得一係唔得，冇話必贏包生仔。但同踢波一樣，踢波有波品，打牌有牌品，選舉呢？一樣要講「牌品」。一個最基本嘅法則係唔好鬧選民。講到呢度，有人就會用德國希特拉1933年國會選舉後，選民將希特拉送上獨裁之路，以證明選叫有時唔鬧真係唔得，因為一味遷就選民就會選個希特拉出來。
咁呢啲真係將時空人物抽空晒，純粹放大某件事之一部分就當為事實之全部來討論，咁樣傾係冇意義嘅。當年希特拉係利用選舉制度，之前將有反對派列為非法，唔俾參選，然後再安排假選舉搞一黨獨裁。依家我地講緊一個，DQ咗一個參選人之選舉，而且香江呢個選舉係冇乜實權，選民嘅反應，自然又唔同納粹年代啦，係未？
言歸正傳。選舉牌品number one，就係輸咗唔好鬧選民。點解呢？我地要假設選民眼睛係雪亮嘅。佢地響選擇候選人之時，一定會想個究竟，大抵都知道點解唔投邊個，點解會投嗰個，上次選民可以投建制，今次可以投泛民。響選舉之中，各派動員好平常也。如果因為政治氣氛唔同，搞到動員力唔夠而輸咗，冇理由鬧選民㗎。況且，選民嘅口味隨時會變，唔可能永遠都支持你，係未？大家要記住，選輸鬧選民，選票只會越走越快。
所以，英國大選在即，政黨都唔係鬧選民，而係想方法吸引選民去支持佢地。保守黨波叔響一個民調之中有47%支持度。保守黨贏咗工黨十九個百分點。保守黨點解咁勁呢？原來佢地成功將嗰班上次走咗去支持極右嘅選民，吸引晒回來。按依家走勢，保守黨有機會爆上五成或以上。只要佢地支持度爆過半，就唔需要同其他小黨組成聯合政府，完全執政下，英帝脫歐冇晒難度。
但波叔最頭痛嘅，唔單止係選舉。英帝最大嘅政治事件，反而係王室。事緣美帝嗰邊有個富商，原來係專門安排未成年少女俾高官政要商人「行埋」。呢位高級中介人響紐約被扣留期間，居然自殺死咗。咁英女王第二仔安德魯王子呢，就被指同呢位富商好熟，仲有一位女士指稱，響佢十幾歲果陣，被安排同安德魯王子「行埋」。安德魯王子俾傳聞纏身，唔知點解想利用訪問澄清，於是早前就約咗電視台訪問，話佢同富商唔係好熟，當日冇同果位十幾歲女仔「行埋」等。講完後，出晒事啦，好多人話真係公關界災難。跟手無耐，女王叫王子以後唔使出任公職。冇公職即係冇人工，形同斷佢米路。
據聞女王最錫嘅仔，係安德魯。邊個可以夾到女王忽然下達禁令呢？原來係查理斯王子！原來最近傳出，女王有意退休，將王室事務逐步交俾查理斯。既然查理斯落柯打，女王都冇計矣。
倫敦大學亞非研究學院法律系博士