年底收爐。以前唔係好明，點解鬼佬響十二月已經好似冇咩好做。後來去英帝唸書先至知，有乜嘢搞都好，千祈唔好將個死線放響十二月底，因為好多時鬼佬同事會輪流放假返家鄉。英帝呢？波叔響贏咗選舉之後，即刻拿拿聲將個脫歐協議送上去國會。好簡單啫，因為佢哋成班人都響度等緊放聖誕假，佢做完個國會辯論之後，完成咗個脫歐大方向，大家就收爐等下一年了。因為聖誕假之後，傳統就會放成個星期的假期，公司大減價，市民瘋狂shopping，仲做嘢咩？有事就等下年啦。
歲晚收爐時，工黨都開始反省。佢地輸了選舉之後，內部有呼聲話，既然選民要求佢地脫歐，而且聲音又強烈，無論邊個做下一任工黨領袖，係未都應該聽民意呢？其實工黨都十五十六，因為反脫歐已經成為了黨內DNA，就係因為主流民意想脫歐，領導層就亂晒龍。但依家即刻轉去支持脫歐呢？會唔會太過突兀呢？工黨領導人彬叔，都事不關己啦，因為依家工黨議席輸到咁，作為影子政府，都冇乜嘢新招去吸引選民。留意英美會唔會有新嘅合作舉動。
美帝又一樣等聖誕。上周民主黨仲響度係咁劈話要彈劾侵侵。好啦，成個眾議院民主黨同侵侵開晒火，講到佢係一個十惡不赦的領袖，壞事做盡樣樣齊。但係，眾議院過咗之後，究竟幾時拿上去參議院，成為咗焦點。有人話係因為侵侵有辦法，寫咗封信嚇窒了眾議院民主黨領袖西姐。得啖笑啦，當然唔係。西姐係老江湖，大把風浪見過晒。佢地係知道，參議院基本上係唔會通過呢個議案，如果貿貿然拿上去被否決的話，侵侵可能仲會更趾高氣揚，而且更加窒民主黨漠視民意。
其實民主黨內不乏聰明的人。佢地都知呢一刻基本上冇辦法拉倒侵侵。如果忽然將侵侵個彈劾案上去，反而有機會逆民意，仲弊。佢地會等一個機會，即係等侵侵犯大錯之時，就可以用彈劾議案拿上去參議院去狙擊侵侵。假如侵侵真係百毒不侵呢？過埋頭一季先算啦。
過年就係要睇下個月，台灣English Choi點樣贏，同埋贏幾多。Korean Fish上埋網紅節目，但高雄動員咗好多人反韓，點睇都知Korean Fish仍然唔得。藍營輸少當贏，只係睇立委仲可否執返多少，而English Choi就日日去各區拉票：係拉立委選舉嘅票。English Choi陣營犀利之處，係拉攏咗一班綠營之內嘅細小黨派嘅人馬出來參選，營造咗一個大團結形象，仲迫到唔肯歸邊嘅綠營小黨冇運行。所以，嗰啲小黨唯有走更激路線，包括利用香港議題加埋難民法去搶攻囉。
小弟由阿扁年代開始，深深感受到香港議題，由過往綠營cold shoulder忽然變咗hot potato，真係百般滋味在心頭。總之一句：人哋幫香港人係人情，唔幫才是道理。