點解忽然間，某些極端聲音又會出翻來？即係又要隊呢樣又要隊嗰樣，又話呢個獨又係嗰個獨呢？我地分析事情，唔可以孤立地以香港為本位，去睇北大人對港之政策。係要全方位。先睇下依家北大人最緊張嘅係乜嘢，乜嘢係佢地最高之priority，同埋響呢個最高之priority之中，香江係擔任緊乜嘢角色，然後再望吓，北大人點樣處理兩岸，咁就會摸到一些頭緒。
English Choi有一班智將，高智慧嘅，佢地最近有一個分析，係唔明白點解依家對台政策，出現咗一啲極為不理性的訊號。佢究竟寫乜嘢，自己上網搵下啦，但佢就直指近半年來，北大人對台有好多唔成熟亦唔應該發生嘅事情，咁佢就疑惑，呢啲非理性之部分，當然係來自最高指示啦，咁點解北方最高指示最近有咁不尋常的反應呢？主要問題係，北方大人咁不理性，而且咁高壓之下，係會迫English Choi響無選擇底下向美帝靠攏，咁唔通向美帝靠攏對北大人來講，係一件好事咩？
用呢個邏輯，響對香江方面，早幾個星期咁樣用核彈去射「獨」，係一件好事定壞事呢？早前仲有人以為，今次都係某啲人，響香江自把自為，走去開「獨」炮，矛頭直指香江「獨」派，依家睇起上來，唔似係呢班人自己關上門去打「獨」，而係真係有的放矢，係有人，仲應該係好高，高到最高指示咁樣，直接落咗柯打要做嘢，矛頭直指某個唔聽話之政府，搞到要逼宮，迫到要開始搞23條呢？當然，好打得一定避無可避，都要硬做，早幾日已經講出來要開會做功夫。咁都有疑問，明知搞23條，一定會畀到空位，等美帝入位搞香江，甚至借此去搞《香港政策法》，咁點解忽然之間，要迫到好打得都避唔到，要搞一些前期功夫呢？
北大人啲政治，唔係我嘅專長，但係北大人咁樣去迫English Choi，咁樣任由某啲力量去夾爆好打得，好明顯就係最高指示，對於美帝之作為，相當火爆，亦都擔心唔去繼續強硬到底，下一波侵侵真係「撬」鬆咗兩岸，「挖」走咗香江，真係歷史上對唔住老祖宗。咁佢之研判，係美帝越係要出手「撬」鬆English Choi或者好打得，北大人就越要夾實佢地，越要施壓唔畀面美帝。
大家可這樣思考：因北大人力極限施壓夾到成個政府(無論English Choi或好打得)都好難行，市民就好驚，於是會嘈返轉頭，夾番English Choi同好打得轉頭叫佢地跪低。台灣人民會話：English Choi，咁樣做唔得㗎，唔好咁啦，不如向北大人求和啦；香江方面，平日牙斬斬得把口嗰啲中(環價值)坑會話，喂！好打得，好心啦，求其立咗23條算啦，反正我都唔係反中，唔好成日搞到個社會咁分化啦！明乎此，唔好以為今次北大人係非理性，查實，好理性就真！