【六國酒店粵軒】外賣真空蜜汁叉燒

灣仔六國酒店粵軒，每年秋冬期間限定的「黯然銷魂飯」都大賣幾千碗，呢條超人氣燶邊叉燒，食過無不讚好，不過因為疫情關係，今年還未確定推出日期，令叉燒迷引頸以待。
幸好粵軒行政總廚馬榮德師傅顧及叉迷需求，推出真空包裝連禮盒蜜汁叉燒($188/盒)。馬師傅選用匈牙利豬脢頭貪其肉味重，用上獨門秘方醃製，再配合懷舊式烤製方法，每條叉燒燒兩次至嫣紅帶燶邊，確保每條叉燒都散發出焦香味道，原條連蜜汁真空包裝，放入沸水浸十零分鐘就食得。
這個真空即食設計確實解決了外賣叉燒某些問題，例如溫度，好多時下午斬料回家晚飯時已冷掉，翻熱後叉燒又會微微滲出豬臊味，加上已斬件關係，肉味亦流失不少。而粵軒叉燒座熱後溫度十足，原條keep住肉汁，厚切薄切自己話事，叉燒帶點肥位吃落甘香軟腍，煲個飯加隻煎蛋，「家用版黯然銷魂飯」就在眼前。