斬大嚿叉燒
Chop Chop食神叉燒│叉燒，係香港最地道美食之一，多年來穩坐最受歡迎三甲之內，全因價廉物美，無論你身在可方，離開香港日子一久，最掛住嘅始終係一碗叉燒飯。想當年移民潮，識燒臘係一門手藝，喺唐人街可以打橫行，足以證明佢嘅吸引力。不過出名咀刁嘅香港人，普通貨色已不能滿足，開始出現各式各樣變化，例如西班牙黑毛豬做叉燒，繼而發展到類似牛肉一樣，叉燒都有特別部位。攝影：關樂欣
Chop Chop食神叉燒│愈食愈刁鑽 叉燒特別部位
以食神黯然銷魂飯賣到開巷嘅炮台山Chop Chop食神叉燒，最近又新動作，從柴灣叉燒名店找來榮師傅擔任Chop Chop食神叉燒燒味部主廚。榮師傅入行超過30年，對各式燒味製法瞭如指掌，豬肉用本地貨，醃料講究如玫瑰露酒也用上等貨，由醃肉至入爐都用傳統方法，所以叉燒特別香。榮師傅更推出一系列叉燒特別部位，先講「第一刀」，以本地脢頭上肉，即豬肩肉最靚部分製成，肉內帶筋，質地軟腍帶爽勁，脂香而不膩，每日限量供應，要吼住出爐時間，熱辣辣食最好味；「一片天」，即係肥叉，喺豬肋骨上面嗰層脂肪，七分肥三分瘦，經高溫烤到焦糖化加上燶邊，肥位入口即化，正所謂雞要食皮豬要食肥，好此道者啱晒；怕肥人士又想食到肥叉口感，「半肥瘦」最Fit；喜歡有骨落地嘅絕不能錯過「燒排骨」，配上店主為叉燒特別配對嘅限定酒2015 Champ de Cour Moulin-à-Vent ($480)，約埋女朋友食燒味都可以勁浪漫超溫馨。
另有四人晚餐供應($368/每位)，頭盤菜式包括頭盤二選一：「第一刀」叉燒拼「燒排骨」或半隻脆皮乳豬(另加$120)；一款湯、兩道主菜、時令蔬菜、炒飯或麵食。
