以前喺元朗食嘢，來來去去都係大榮華、B仔(得雞尖好食)、牛丸、永年、好到底同埋盆菜，真係食到厭。不過隨住大型樓盤起好之後，各大食肆全面進場，而家已經變成另一個世界，當中鬥得最激烈嘅一定係日本嘢，尤其嗰幾間玩omakase嘅壽司店（我覺得質素一般，叫做OK啦）。其實除咗壽司，仲有一間好嘢，就係匿埋喺雞地嘅高級鐵板燒和菊。
鐵板燒我多數喺日本食，喺香港反而少幫襯，所以我對好食嘅準則係同日本掛勾，食材高級用料新鮮係最基本要求。走和洋風嘅和菊用料頂級，超過三十年鐵板燒經驗嘅大廚梁師傅，對菜式要求特別高，烹調火候功力深厚，加上靚到爆嘅擺盤，影相放FB吸LIKE一流，絕對滿足到我之餘仲充滿驚喜。其中一道和菊煙燻北海道帆立貝：係我呢世人食過最特別嘅一道菜之一：梁師傅先將帆立貝略煎，再放入預先加熱嘅小煲之中，煲內有三種不同嘅菊花(胎菊杭菊及日本菊)，用煙燻令帆立貝盡吸香氣，表面呈金黄色，內裡半生熟狀態，甜+菊+煙燻，味道非常合襯又有層次，食完齒頰留香，真正色香味俱全；黑鱈魚伴直菇洋蔥湯：用嘅係南極鱈魚，魚油極之豐富，梁師傅煎完分成魚皮魚脂及魚肉三部份，再配洋蔥直菇鰹魚湯，用LC煲仔盛載上桌，一個菜包含幾種質感，絕讚；近江A4和牛西冷伴日本溫室野菜：西冷位夠晒雪花，貨靚一定好食，毋須多作介紹，反而伴碟嗰堆蒜片，來自青森，喺日本買都要幾百円一粒，可見和菊用料講究；活鮑魚配鱈場蟹肉海苔汁：大大隻南非鮑，先煎再加牛油焗，原隻上碟，要用刀叉慢慢嘆，鮑魚彈牙兼帶點鹹味，個海苔汁亦不俗，食完飽咗一大半；伊比利亞黑豚配紀州梅山楂汁：正所謂雞要食皮豬要食肥，呢隻豚就啱晒我，脂肪位特別有陣橡果香，八成熟最好，略嫌肥膩的話可蘸汁食，酸酸甜甜唔會膩。其實個套餐仲有好多道菜，價錢大約千五蚊起跳，非常合理，喜歡鐵板燒嘅朋友必定要試。
ps.食完飯啲衫冇乜油煙味，和菊嘅抽風做得唔錯，值得一讚！
和菊
地址：元朗鳳攸北街5~7號順豐大廈地下36號
電話：3709 8826
營業時間：
中午12時至3時
晚上6時至11時
