金夕何夕‧美利酒店

從來沒想過，去一趟The Murray美利酒店Staycation，猶如上咗一堂歷史課，美利酒店前身為美利大廈，屬政府辦公大樓，這幢大廈1969年落成，見證著香港發展，當時建築師Ron Philips，大玩拱廊設計，而辦公室樓層窗戶採用正方形嵌入式，形成斜角，有助減低太陽直射令室內溫度升高，這一扇窗當年獲獎無數。幸好，五十多年後，美利大廈完成歷史任務後，經活化變成美利酒店，新的設計由英國著名設計事務所Foster+ Partners主理，保留原本設計概念，以金色線條作為主調，由酒店外圍、大堂伸延至酒店房間，並加入大量藝術裝置。須知道金色落在某些人手中會變為土豪金，但喺英國設計師手上，金色加上一幢四四方方嘅白色大廈，兩者結合視覺上立即呈現出幾何美學，而我作為一個設計人，實在歎為觀止。

攝影：莊振邦、Spring

美利酒店旁邊，有一棵百年古樹「節果決明」，04年還入選「古樹名木」行列，早在此處落地生根的它，經歷過爛根、感染真菌，現時只剩下一半樹幹。我想信它往後生命力只會更強，出年初夏開花之時再來觀賞。

今次Staycation揀咗Signature Suite，大約八百呎，大廳客房間格分明，簡約為主，室內光線充足，完全感受到嵌入式窗戶設計優點。浴室寬敞明亮，大大個浴缸配上金色水龍頭，係型嘅，難怪咁多人坐喺浴缸打卡放IG，我就冇咁做嘞，知醜嘅，反而喺書枱扮工，感受一下當年公務員工作還境。The Murray房間細節&設備做得不錯，好抵讚。1.酒店茶包—有十二包Tea WG茶包共四款茶葉，毫不吝嗇，鍾意飲茶嘅我幾個Capsule完全冇掂過。2.梳化設有三腳插—對於喜歡釀喺梳化玩手機嘅人，會明白有幾好。3.迷你影院—電視娛樂系統有好多戲選擇，電視亦夠大，而最最最令我驚喜，係電視下面嘅Samsung sound bar，呢條sound bar超級好聲，大聲少少都唔怕嘈到人，我開支香檳睇咗《The Way Back》、《水行俠》、《哥斯拉大戰金剛》同埋《魔雪奇緣2》四套戲，很爽。4.沐浴用品Grown Alchemist—除咗沖涼三寶，仲有三支Facial cleanser,Balancing toner & Body cream，好貼心，女士們大愛。5.浴室Magic Glass—即係霧化玻璃，係一種通過電源控制去轉換玻璃霧化或透明，我諗小情侶會特別喜歡呢個設備。

餐飲方面，晚餐我揀咗位於酒店頂層嘅Popinjays，四道菜晚餐頗有水準，仲有浪漫醉人中環夜景，食完飯可慢慢chok。而早餐喺花園樓層The Tai Pan，半自助+一款主菜，選擇多質素好，揀麵包我都諗咗好耐。The Murray係寵物friendly酒店，頗多狗狗喺花園走動，輕鬆寫意，一日之計在於晨，展開新一天的完美方法。