最新政府提供的人均面積中位數為161方呎。(資料圖片)
上星期講過香港停工一日損失不是將GDP除以365日咁簡單，更要考慮行為的改變(這跟早前講過「五萬億利益輸送」的謬誤有異曲同工之妙)。相比空泛無邊的「論述」，有數字的確會使討論清楚一點，但數字同時又有其誤導性，讓人有科學嚴格的錯覺，誤將亂計出來的數字當成有力證據。
例子1：香港已落成住宅單位約275萬個，家庭住戶則只有250萬個，單位數目比家庭人數多，所以「香港沒有房屋短缺問題」(語出姚松炎教授)，所以應徵收空置稅「釋放」單位(有此推論者多不勝數)。
若住宅單位是囚室，香港家庭是囚犯，一個家庭固定安排一個囚室，供應充足的觀點是對的，只是人會搬屋，搬屋搜尋需時，於是單位有一定空置率好正常，就如私家車數目比車位要少一樣。兩個數字有差距的另一大原因，是香港單位大多細小，中上產家庭嫌千幾呎不夠用，自然要多買單位儲物或讓子女有「私人空間」。
例子2：最新政府提供的人均面積中位數為161方呎，政府就「土地大辯論」提出的1,200公頃估算，除了根據人口增長預測，也假設這個人均呎數不變。左翼如本土研究社的一個論點，是統計處過去多次高估人口，其實真正房屋需求冇咁多，需要遠少於1,200公頃的土地。
計完一大輪之後，其實有冇諗過香港人點解要命中注定面積中位數161方呎？這是假設了香港人住得冇質素，這是假設了未買樓的中產冇運行。
例子3：土地面積唔只係一條加數，唔係話你東拼西湊到100公頃，就可以取代另一塊100公頃的土地。「土地大辯論」的一個方向，就好似玩Where’s Wally遊戲一樣，在香港地圖上找出呢度一塊果度一塊的土地，加起來等如幾多幾多公頃，可以容納幾多幾多住戶。如此「插針式」起樓的思維好有前朝風格，之但係起樓唔係起完搬晒入去住就算，因為正常人除了住，仲要食仲要玩仲要行街，仲要返工仲要運動仲要湊仔返學，人太多四圍走仲會造成交通擠塞。
政府提出1,200公頃的估算或有水份，但其實一大堆的棕地、私人遊樂場地契約土地、低用量政府土地加埋條數雖然好可觀，入面到底又有幾多適合起住宅甚至高密度住宅？
加減乘除計得啱，只算係跟一部計數機打成平手，但唔等於有道理㗎。