![亨利跳板](https://cdn.am730.com.hk/s3fs-public/styles/article_image/public/2024-07/14-06_1.jpg?itok=zzq7ifS0)
亨利跳板
奧運足球以往好睇,迷你世界盃,新星跳板。筆者喺96年阿特蘭大奧運以記者身份走訪奧運,喺海中快艇親睹李麗珊喺風帆歷史性終點封后;又同好多行家一樣,最期待抽到飛入場採訪男足嘅「超霸鷹」尼日利亞,點樣神奇連殺南美兩大勁旅,包括有白必圖、朗拿度嘅巴西同基斯普、辛尼迪同施蒙尼嘅阿根廷封王。當時傳媒中心喺奧運尾聲仲人頭湧湧,抽唔到波飛嘅各國記者,望住大電視見證呢隻「鷹」歷史時刻。奧運足球往往因各大洲代表隊數分布平均,實力接近,形勢緊湊。
如今各球會線眼鋪天蓋地,超新星唔易喺奧運突爆,但各強隊唔會齊人,形勢依然亂局。今屆巴黎主辦,賣點當然係亨利領軍嘅法國,該國經歷大國腳喺歐國盃悶波失意後,當然希望講波叻、但教波未證明太有能力嘅亨利,為法國爭一口氣;不過要搵到佢阿仙奴師弟、33歲嘅拿卡錫迪喺前線數胡,呢鋪先係亨利再考牌嘅跳板。拉雜成軍都幫到「雄雞」一償40年夙願摘金,咁大國腳主帥迪甘斯教咗12年份工都可執定包袱。