仲造唔造星？
ViuTV《全民造星》宣布第六屆接受報名，網民有讚有彈，有人高興花姐回歸，亦有人批評Viu食老本，覺得應捧紅之前幾屆啲人先。究竟仲造唔造星？
第一，有人覺得要捧紅晒之前咁多屆嘅人，先好再做下一屆，大概認為《造星》係ViuTV嘅「僱員培訓節目」，為自己台招募藝人而設。但其實睇返以往咁多屆嘅囝囝囡囡，除咗收歸旗下嘅MIRROR、ERROR、COLLAR同ROVER等，更多係喺唔同公司發展緊，包括張天賦、雲浩影、Lolly Talk，甚至北上發展嘅曾比特。記得有年《叱咤頒獎禮》後，有傳媒統計過成晚四成獎都係由「造星幫」囊括，所以《造星》面向嘅唔只係ViuTV，而係為成個樂壇注入新血。究竟係唔係要繼續做，或者應該問大家覺得成個行業係唔係已唔需要新人？只記得，不久之前我哋先感歎過香港偶像凋零，頒獎禮來來去去都係嗰幾個人。
第二，記得第二季時，ViuTV已講過《造星》要長期做，因為每隔一段時間就會有新人想入行，即係好似香港小姐咁，年年都會有女仔夠18歲入場門檻。其實只有好似《單身即地獄》呢種不斷消費個idea嘅節目，先會做兩三年就玩完。如果係想設立一個機制，帶新人入行，就要長期先會有效果。即係冇人會批評奧斯卡食老本，相反正正因為奧斯卡堅持做，經過幾十年，先會變成一件國際盛事。其實上年已冇舉辦《造星》，相信ViuTV都係有心長遠做先會調整個密度，保持質素，想呢個唔係電視節目咁簡單，而係為入行建立一個機制。當然做唔做到就靠第三點 。
第三，歷屆港姐有家傳戶曉，有面目模糊，但唔代表《香港小姐》呢個節目嘅成敗。我覺得《造星》成敗係在於帶唔帶到新人入行之外，個節目有冇新元素，賽制或玩法會唔會與時並進，更加適合2025年嘅造星偶像，令觀眾有新鮮感。呢啲嘢，都要睇個節目先知。
ViuTV仲造唔造星？我會話，個節目唔好睇，就唔應該做。我拭目以待。