破地獄都破唔到嘅五個定律
一/ 「子華神永遠都係子華神。」黃子華近年電影票房高，但《金像獎》男主角連提名都冇，多少反映行內人仍然唔太認同佢嘅演技。唔少人話佢做戲時都係做返自己，《破．地獄》我覺得佢有努力「破」呢個框，用較內斂嘅演法；但到後段，尤其係高潮嘅演說一幕，語氣同眼神又好似去返棟篤笑嘅子華神咁。子華神喺香港人心目中形象太深刻，要有更突破嘅角色先破到呢個地獄 。
二/ 「《金像獎》係電影公司嘅力量競技場」。我大膽斷言明年影后一定係衛詩雅，我覺得佢喺電影中表現係中上，未至於石破天驚。但點解話佢一定會贏？衛詩雅入行以來表現穩定，儲夠一定認同分，再加上電影係英皇投資，《金像獎》投票嘅都係業內人，邊間電影公司開得戲多，自然接觸到更多業內人就有優勢。《金像獎》係電影公司力量競技場，當中得三間有條件廣納票源：英皇、安樂、天下一。你睇返呢幾年嘅提名同獲獎名單，就明點解我話衛詩雅一定贏 。
三/ 「對白金句比畫面容易瘋傳，但畫面比金句更易入人心」。電影中最後黃子華捍衛男女平等嘅言論被廣泛討論，但我覺得最入人心嘅係女同性戀人一幕。死者老公(白只)唔俾一個女人見死者最後一面，成段戲冇用對白交代女人同死者嘅關係，但畫面就已經令人明白女人先係死者嘅真戀人。老公同女人對死者嘅態度，強烈對比真愛同世俗，帶出同性平權概念。無金句，但張力十足。唯一缺點係白只實在太搞笑。
四/ 「電視電影對演員都好重要」。《破．地獄》中有好多演員，近年都電視電影兩邊走，衛詩雅、白只、梁雁婷、朱柏康、駱振偉等。以前係電視去電影，而家係一種我會形容係hybrid混合式培養。始終電視電影產量冇八九十年代咁多，演員做下電視又做下電影，keep曝光同實習機會。電視電影對培養演員都咁重要，所以我想帶出最後一點：
五/ ViuTv播緊《選角》真人騷，幾好睇，有深度，好多新演員好熱血，導師嘅評語亦好有深度，值得留意。我見有網民以為我係ViuTV打手，所以我決定試下硬銷ViuTV，睇下吸唔吸引到人去睇呢個節目。試下破一破「讚美就一定係打手，打手講嘅嘢就一定係垃圾」呢個定律，破唔破到？篇文條題就係我嘅答案。