那年盛夏，誰綻放如花？
ViuTV趁臨暑假完播咗套燒腦劇《那年盛夏，我們綻放如花》，網民似乎幾受落。其實香港要拍有關超自然嘅懸疑推理校園劇情片，可以話係藝高人膽大。
第一難，爆頭。唔止突破電視尺度咁簡單，係擺明知道要諗方法上到電視，同時又要令觀眾幻想到個畫面。而網上版仲做埋特效，技術同資源點可能取悅到一班已被荷李活特技寵壞晒嘅香港觀眾？最後我睇到兩者都叫做到普遍收貨，已經唔容易。
第二難，推理劇。日本動漫珠玉在前，你睇《死亡筆記》，做到懸疑得來又合理，仲要觀眾跟到。呢種劇不能太多bug，又不能太難follow，一方面考驗編劇嘅功力，另一面都考電視台對觀眾嘅信任。明明拍下愛情片或者爭產劇，觀眾都會收貨(雖然鬧住睇)但肯定睇得明，要挑戰深度推理劇，由創作團隊，甚至係電視台，都要有好大嘅勇氣。
最後最難：演員。校園劇需要大量飾演學生嘅演員，視覺年齡不能太老，戲又唔能夠太差。劇情有科幻元素，演員太熟口面，可能令觀眾冇距離感，但全部新人又點保收視？最好就搵班生面口又似學生又啱特定人設嘅，呢個非常考導演心機。導演陳健朗講過，佢用大量時間同每個casting嘅演員溝通試戲，造就今次出色選角。當然電視台亦同導演一齊膽博膽，冇強迫用啲大星，就算果幾個自己嘅藝人，聽講都係由導演自己揀，真係啱個角色先至用，唔欽點，投資者肯放手，選角嘅自由度同準確度就大大提高。
最後，特別想講被選中嘅Marco、Geroge同Marf，竟然做出好多觀眾未見過嘅表現，突破咗佢哋嘅框框，咁對電視台，對作品，對導演，對觀眾，同對演員本人都係好事。
每粒星嘅軌跡都唔同，有人一夜爆紅，有人靜待10年。所以，邊個夠膽話《全民造星》最成功係捧出MIRROR、ERROR、COLLAR、MC或Lolly Talk？或者每年盛夏，都有誰，能綻放如花。