HANARE 將燒肉推向極緻

和牛北海道海膽壽司，食味無以上之，除此之外「御造り」還有牡丹蝦、中トロ及鯛魚等時令刺身。

喺香港想食高質嘅日本燒肉，中環Yakiniku Jumbo必定佔一席位，但食多幾次都難免有點納悶，想味蕾再挑戰燒肉最高境界其實仲有選擇，就係Yakiniku Jumbo裡面嘅隱藏大佬HANARE。只容納8人嘅HANARE走懷石路線，裝修風格似足高級壽司店，由精通懷石料理嘅小屋孝行主理，出身自日本群馬縣嘅小屋主廚有超過20年經驗，將日本最頂級和牛融入傳統懷石料理當中可謂駕輕就熟。Lunch提供嘅「六道菜薈萃菜單」$1,280，有齊先附X2、御造り、燒物X2、食事及甘味等；【先附】由特選黑毛和牛他他配魚子醬再加黑松露打頭陣，咁嘅陣容根本冇得輸；【御造り】和牛壽司配北海道海膽係food porn大挑戰；【燒物1】Yakiniku Jumbo招牌野原燒有幾好食不用多說，HANARE以溫泉蛋汁+黑松露將野原燒推向另一層次；【燒物2】用上極少數燒肉店會提供嘅鹿兒島和牛Chateaubriand(十肩脊)，稀有部位入口細嫩肉味濃厚，難怪成日本燒肉迷新寵兒。呢個Lunch set一道比一道精彩，千三蚊就可以品嘗到日本一級和牛食材，貴係貴啲，不過食就唔慳啦。