MIRROR演唱會不是MIRROR成員演唱會
條題咁長，但只要心靜，其實好易明，但偏偏又有好多人唔明。唔明嘅原因，係因為太愛。太愛，所以心盲無明，所以個心唔靜。
MIRROR演唱會開鑼，之前好多傳聞，引起好多意見。例如曾傳姜濤同Anson Lo會合唱，引起fans不滿，仲講到要罷睇；又盛傳8人solo名單，有fans又問點解有4個人冇份？點解頭場係A唔係B？先不論班fans點解成日因為盛傳就咁激動，仲要唔係講下就算，聽聞有fans真係DM鬧演唱會工作人員㗎。演唱會未開就咁多不滿，我有兩點分享：
1)好愛一個人，只想睇到佢嘅嘢。MIRROR當中每一個人，都有兩個身份，既係佢哋自己，亦係MIRROR中嘅一員，今次唔係個人演唱會，而係MIRROR成隊人嘅演唱會，即使有solo 部分，都係以「MIRROR成員」嘅身份表演。fans係愛一個人，應愛晒兩個身份。小組又好，團歌又好，solo 又好，係一個整體，加埋先係MIRROR演唱會。
2)Fans對「傳聞」反應咁大，好大程度因為同團間嘅競爭，但希望fans們明白，你哋嘅偶像真正對手唔係團員，而係其他歌手。情況就好似考DSE，只著眼同班同學間嘅比較有意義咩？真正嘅競爭係全港嘅學生。
娛樂圈競爭大，MIRROR嘅地位唔只同輩同新人，其實連啲口裡說支持嘅「前輩」，個心就都想取代佢哋。而MIRROR嘅優勢，正正係12個人整體嘅聲勢(包括所有團歌、小組組合、solo)，都一定係幫緊佢地每一個。成員之間fans嘅惡鬥，只會益咗其他人。唔係要你咁大愛，支持晒所有MIRROR成員，但你憎佢嘅隊友，製造內鬥，最後只會傷害埋你鍾意嗰個。
MIRROR 5周年節目《MIRROR Time》，鏡仔寫信訴心聲環節，分別講到5年來有高有低，有開心，都有拗撬，但都感恩有MIRROR成員一齊經歷同成長，會保持初心，繼續一齊追夢。唔少鏡粉睇完都話好感動，感動之餘都請行動，少啲內訌，多啲支持，fans眼光愈闊，偶像亦可以去得愈遠。