「岳飛，字鵬舉，相州湯陰人也。生時，有大禽若鵠，飛鳴室上，因以為名……」一篇《岳飛之少年時代》，一首曾經中一必背嘅課文，一代一代都問唔知學嚟做乜嘅文章，仲要年代和作者資料都不詳。
原來自1982年開始，中、小學同時推行中文科輔導教學，從此個個Form 1仔中文堂都天真咁問乜嘢叫做「字鵬舉」。有傳岳飛之出生充滿神奇色彩，其時因岳母見大鳥在房子上飛鳴，於是為愛子取了單一動詞「飛」字作名。而「字」「鵬舉」即根據人名的字義，另取嘅別名。所以每一個初中生都會被同學「字」其別名，有啲甚至以此常作稱呼至終其一生。正所謂「唔怕生壞命，最怕改壞名」，係有point㗎！
華洋結合，兩者要夾
文字係有力量嘅！上帝創製世界都係話有就有，甚至極權國家都立法以言入罪，可見文字代表思想反映其威力甚大。正所謂「人死留名，豹死留皮」，大丈夫「行不改名，坐不改姓」，行得正又企得正，當無愧於天地又何需隱姓埋名。所以個名改得好，可以助一臂之力，更何況係用足一世，冇乜必要都唔會更改。
由於1974年前英文係香港唯一法定語言，雖然廣東話係我哋母語，但所有涉及政府及法律文件都只可以English，每個地方連街名甚至港人，都有一個以中文粵語作為對照嘅英文拼音名字，自此女性阿雯叫Man、阿新變為Sun、阿鵬直情Pan，所以改中文名都要留意英文音譯意思。
如此年代，如詩風雅
當然Siu Ming同Ming Fai一拍埋去比Susan同Mary輸蝕，尤其配埋中文嘅瑪莉，連本身冇英文別名嘅，都要於小學英文堂時改番一個。的確離開中學之後，同學朋友同事都係多叫英文名稱，亦不難發現，每個年代都有佢嘅特色，一睇個名都估到對方乜嘢年代。
由七十年代之前嘅Margaret、John、Steven、再到八十年代嘅Janice、Shirley、Vivian、Andy、Jacky；九十年代開始日化有Momoko、Miki、Suki、Yuki，又或港劇律師樓永遠都係CY、KT呢啲中文名字的英文縮寫，甚至千禧世代阿欣嘅阿Yan、Yanki、Yannes、疊字CoCo、BoBo、JoJo、YoYo等等。而有心思Good Choi同Annie Mao，都係後天技高一籌，顯出智慧。
易明易讀，也可脫俗
當然黎煥正記得嚟換證，邱慧琪留意優惠期，陸浩昌請到五號窗都會係都市笑話。但近年改名玩到甚至連中文老師都唔識讀嘅冷古僻字，優美欠奉之餘也乏真意，恍如二次創作之《麥兜之少年時代》，唔係乜嘢字都可以用嚟改名。部分坊間研究發現，當一個人的名字永遠俾人叫錯或者不能讀出，當事人的情緒難免波動，所以「岳飛，字鵬舉」，確係清清楚楚，唔會讀錯。
