港灣一號歎茶。一盅好多件

面對疫情，餐飲酒店業首當其衝，二人限聚令下紛紛各出奇謀去爭取本地客源。由陳漢章師傅主理的港灣一號，最近推出周末精選早晨點心套餐，逢星期六、日朝早九至十一時，分三個價錢$398/六款點心、$498/八款點心、$598/十款點心。如果揀398連加一約四百蚊左右，二人前價只係每位兩百蚊，以君悅酒店級數來說，可謂超值，我當然瞓都唔瞓飛身去歎早茶。餐牌有齊廿二款包括蒸點心、炸物、腸粉、粥粉麵飯等，為免自己選擇困難，是日揀了$498/八款點心，由名廚章哥親自監督。點心相當精緻，蝦餃晶瑩通透質素極好，燒賣、牛肉球很紮實味道佳，不會將價就貨，擺明益捧場客。當中最深得我心肯定係梅菜叉燒腸粉，皮薄餡多油潤非常靚仔，入口既香且滑，呷啖普洱，邊看維港晨早美景，甚麼疫情鬱悶統統拋開。優惠去到九月尾，訂位要快，下次來我要食！十！款！
港灣一號│灣仔君悅酒店八樓│2584 7722