有一晚我喺日本新潟越後湯沢割烹一二三居酒屋，
食緊條燒黑喉魚，鄰座日本人見狀，指住我條魚直豎拇指，
我點頭示好，後來想叫鮟鱇魚肝(あん肝)，
點知最後一碟俾隔籬兩個日本人叫咗，
我抱住個頭大叫：「殘念」，
又點知………………個日本人分咗半楷魚肝俾我食，超感動。
之後問我邊度嚟，我話「康kong」，
兩個日本人即刻窒咗一窒………………(呢幾秒靜過太空)
你眼望我眼，
跟住其中一位說：大丈夫です。
然後就笑了，我再向佢哋點頭舉杯，
居酒屋的日本人，特別好。
隨著肺炎疫情嚴峻，
無論香港或日本都不能獨善其身，日本的朋友們，大家都要保重。
呢半楷鮟鱇魚肝，此刻無價。
最時令最好吃的已掛滿牆上，餐牌可以不看。
湯沢割烹一二三
越後湯沢商店街的割烹一二三，由昭和9年12月開始，店長祖父以漁屋形式開業，直到昭和57年店長父親接手，至今85周年，發展到現在的居酒屋形式，現時已經係第三代。一二三屬典型舊式居酒屋格局，長吧枱位氣氛濃厚，女大將亦略懂英文，由於位處滑雪旅遊區，晚上經常爆場，最好預約。
原條黑喉(のどぐろ4250円)─高級魚，擁有紅色嘅外表，因為口內呈現黑色被稱為「黑喉」，特點係魚脂豐富，原條燒最能表現出應有香味，肉質紥實鮮美多汁，加上香脆外皮，食味無以上之。
來自新潟八海山的啤酒品牌，使用南魚沼名水「雷電神之清水」釀造的RYDEEN BEER ALT(900円)入口香氣夠又順喉，微甜微甘非常清爽，好山好水好啤酒，我飲咗兩支先夠喉。
蛤蜊牛油燒(アサリバター焼950円)─清酒煮就食得多，其實我比較鍾意牛油燒，鮮甜惹味。
割烹一二三│新潟県南魚沼郡湯沢町大字湯沢372-1│定休日水曜日│025-784-2039
