去台北打邊爐，次次都麻辣鍋養生鍋，悶㗎嘛。如果你係牛魔王，不如試下台灣嘅溫體牛火鍋，呢間新北市新莊嘅「饗牛二館」，主打台南溫體牛(即係現場屠宰或未經雪藏的牛肉)，每日由台南送到，全程保鮮，而每隻牛都有身份編號及產銷履歷，有疑問都有編號可以追查，唔似得香港嗰啲blue object咁冇number，可以安心食用。湯底我揀「最愛筋肉鍋」 NT$350(小) 只有牛&洋蔥，湯頭清甜，而牛肉點咗三款，主力揀啲稀有部位嚟食。
最愛筋肉鍋
雪花牛肉 NT$520—切得薄薄帶點雪花，淥佢五秒食得，肉質鮮嫩帶有甘甜味，唔似喺香港食到嘅本地牛咁重牛味，我個人就幾鍾意喇。
稀有肋眼蓋 NT$600—肋眼蓋即係ribeye位，件件厚切有唔少肥位，要淥兩三分鐘，入口有嚼勁兼肉汁四射，牛味甜味大爆發，真係好食到爆燈，必吃!!!!!
雪花牛肉
稀有肋眼蓋
白玉紅寶石 NT$550—又係稀有部位，近patpat位，因為經常郁動關係肉質比較瘦，而每片都連住一片肥位，口感非常獨特，白色脂肪加紅色瘦肉賣相矜貴，難怪個名叫白玉紅寶石。
手感花枝丸 NT$200—呢度嘅花枝丸亦係必點之一，淥完勁大粒，每啖都係花枝粒，想淨係食啖粉漿都唔得。
白玉紅寶石
手感花枝丸
總括嚟講，呢度嘅台南牛肉食材新鮮，香港一定食唔到，加上CP值OK，所以我最近嚟台北兩次都有嚟食。
饗牛二館│新北市新莊區頭前路96號│ 886 2 8991 1818
