頭盤─柚子汁燒鱈魚
頭盤─煙燻素鵝
認識美麗華國金軒主廚鄧浩宏師傅兩年多，記得第一次試佢手藝，即被其中一度菜「西班牙紅蝦濃湯」深深迷倒，湯裡隱藏咗陳村粉及竹笙盡吸濃湯精華；第二次見面再來個「海鮮湯燴珍珠糯米飯伴古法蒸白鱔腩」，糯米用海鮮湯好似risotto咁煮，每口糯米飯都充滿鮮味。宏師傅利用西方烹調技術融入中菜當中，無論眼界視野菜式賣相以至味道，都感受到佢將新派中菜推向極致。
西班牙紅蝦濃湯
海鮮湯燴珍珠糯米飯伴古法蒸白鱔腩
今次再見面驚喜依然，頭盤三小碟由淡到濃已經好味到離晒大嫂，尤其係玫瑰鮑魚酥─用九孔鮑先蒸熟再用鮑汁雞腳煲至入味，配自家製酥皮同埋玫瑰醬，由軟淋到酥化，一啖有齊多種口感，我敢講呢個酥係全港最好食之二；藤椒東星斑撈白麵─先用乾蔥京蔥加雞油爆香成乾蔥油，再用蝦米雞湯糖生抽老抽用慢火煮汁，撈勻上海白麵，麵條上放上用藤椒油一齊蒸嘅東星斑，藤椒油慢慢浸落白麵，食落味道相當複雜，蔥香濃郁麻味綿長，兩種油互相衝擊味蕾，好食到我食完鬧個碗黐線！
頭盤─玫瑰鮑魚酥
藤椒東星斑撈白麵
好多新一代中菜師傅都係有心人，尤其宏師傅，一放假就會周圍去試菜，喺東京三四萬円食「龍吟」都面不改容，永遠抱著觀摩學習嘅心態不會固步自封，讚！ 隱藏菜式可在訂座時查詢。（需預訂）
國金軒│尖沙咀The Mira Hong Kong 3樓│2315 5222
集宏師傅郵是常識吧